Umurenge Kagame Cup- Gasabo: Umurenge wa Jabana ugeze ku mukino wa nyuma usezereye Rusororo

Kuri iki cyumweru Tariki ya 19 Gashyantare 2023, mu karere ka Gasabo hakinwaga imikino ya ½  mu irushanwa “ Umurenge KAGAME Cup” hashakwamo ebyiri zizavamo imwe ihagararira akarere ka Gasabo.

Ni imikino yakiniwe ku bibuga bibiri ari byo Gikomero Stadium aho Umurenge wa Jali wahasezereye Umurenge wa Gikomero yari iwayo ndetse no kuri Jabana Stadium haberaga umukino utari woroshye hagati y’impande zombi.

Uyu mukino ikipe y’umurenge wa Jabana yasezereyemo ikipe y’umurenge wa Rusororo wari witabiriwe n’abatari bake yaba abayobozi b’inzego zitandukanye ndetse n’abafana bihebeye aya makipe yagaragaje umukino uryoheye ijisho

Mbere yuko uyu mukino utangira abakinnyi, abayobozi, abafana, abatoza, n’abandi batandukanye bari bawitabiriye babanje kuganirizwa n’abayobozi b’imirenge yari ihanganiye uyu mwanya wa nyuma mu irushanwa Umurenge KAGAME Cup ariko mu karere ka Gasabo.

Umunyamabanga Nshingwabikorwa w’umurenge wa Jabana, SHEMA Jonas yafashe umwanya aha ikaze ndetse ashimira buri wese waje kwihera ijisho uyu mukino aho yatangiye asobanura ibyiza by’iri rushanwa  ryagaragayemo ubukangurambaga butandukanye.

Uyu munyamabanga yasobanuye ko iri rushanwa ryaziye igihe kuko abaza kureba imikino bataha bungutse byinshi yaba kureba no kuzamura imnpano, kurwanya indwara runaka ndetse no gukumira bimwe byadindiza iterammbere ry’igihugu.

Yahise aha ikaze n’umwanya Umunyamabanga Nshingwabikorwa w’umurenge wa Rusororo, Matabishi Desire Nsabimana aho nawe yaje yunga murya mugenzi we maze asaba abakinnyi ,abatoza ndetse n’undi wese wari waje kwihera ijisho uyu mukino ko bagomba kurangwa n’indangagaciro na kirazira.

Nyuma y’ubutumwa bw’aba bayobozi hahise hakurikiraho akanya ko guha icyubahiro no kwibuka abaherutse gupfira mu mpanuka y’ubuhunikiro bw’ibigori mu murenge wa Rusororo.

Uyu mukino watangiye ukereweho gato wasifuwe n’abasifuzi b’inararimbonye mu gusifura imikino ikomeye mu byiciro bitandukanye birimo n’ikiciro cya kabiri aho hagati hasifurwaga na Deogratias Bihoyiki naho ku mpande hasifiurwaga na Shema Amiable ndetse na Harorimana Patrick 

Mu gice cya mbere ikipe zombi zatakanaga ariko cyane cyane abataka b’ikipe y’umurenge wa Jabana ntibahaga agahenge ubwugarizi bw’ikipe ya Rusororo byaje gutuma iyi kipe ya Jabana irunguruka mu izamu rya Rusororo.

Igice cya mbere kirangira ikipe ya Jabana iyoboye ku gitego kimwe cyabonetse ku munotra wa 27 ari nacyo cyayihesheje intsinzi yo kugera ku mukino wa nyuma bazacakiriranamo n’umurenge wa Jali wasezereye Gikomero yari ku kibuga cyayo.

Igice cya kabiri nacyo kitatinze gutangira cyatangiranye imbaraga ku mpande zombie nubwo byaje kurangira ntakipe ibashije kurunguruka mu izamu ry’iyindi muri iki gice cya kabiri.