Nyuma yo kuraswa,Umunyapolitike Tundu Lissu yagarutse muri Tanzania

Nyuma yo guhora agenzwa mu gihome agahitamo guhunga igihugu, umunyamategeko akaba n'umunyapolitiki utavuga rumwe n'ubutegetsi bwa Tanzania Bwana Tundu Lissu yatangaje ko agiye kugaruka mu gihugu nyuma y'imyaka itatu ari mu buhinguro mu Bubirigi.

Kuri uyu wa Gatanu tariki ya 13 Mutarama 2023, nibwo bwana Tundu Lissu yatangaje ko agiye kugaruka mu gihugu cy'amavuko akava mu buhinguro mu Bubirigi.

Yatangaje ko azagera muri Tanzania Kuri tariki ya 25 Mutarama 2023. Agarutse mu gihugu nyuma y'uko Perezida wa Tanzania Madamu Samia Suluhu Hassan atangaje ko amashyaka atavuga rumwe n'ubutegetsi yose yemerewe gutanga ibitekerezo mu bwisanzure.

Tundu Lissu akaba yarahunze igihugu nyuma yo gutsindwa amatora yahatanyemo na John pombe Magufuli mu mwaka wa 2020.

Uyu Tundu Lissu yamenyekanye nk'umunyapolitike utarigeze uvuga rumwe n'ubutegetsi bwa Tanzania ku ngoma ya Magufuli kuko yafunzwe inshuro nyinshi cyane azira kunenga ubutegetsi bwa Magufuli no kumwita umunyagitugu.

Mu mwaka wa 2017 Tundu Lissu ubwo yari mu modoka ye mu murwa mukuru Dodoma yaje kuraswa n'abagizi ba nabi arakomereka cyane. 

Ubwo yari mu bitaro I Nairobi yatangarije Abanyamakuru ko Guverinoma yohereza abicanyi kwibasira Abanyapolitiki bazira ibitekerezo binyuranye nibya Leta,asaba imiryango mpuzamahanga kwamagana ubutegetsi bwa Magufuli.

Bwana Tundu Lissu akaba yaravutse kuri tariki ya 20 Mutarama 1968 muri Tanzania. Uyu Tundu Antiphas Mughwai Lissu akaba ari Umunyamategeko ndetse  n'Umunyapolitike wo mu ishyaka ritavuga rumwe n'ubutegetsi rya CHADEMA.

Lissu akaba yarabaye Umudepite mu nteko ishinga amategeko ya Singida kuva mu mwaka wa 2010. Yahoze kandi ari Perezida w'ishyirahamwe ry'Abavoka muri Tanzania.

Tundu Lissu kandi yari umuyobozi mukuru mu by'amategeko mu ishyaka ritavuga rumwe n’ubutegetsi bwa Tanzaniya CHADEMA.